MAPAGPASYANG RESOLBAHIN ANG MGA UGAT NA DAHILAN NG KARAHASAN! Bago pa man magwasiwas na mabangis ng kapangyarihang miltar ang berdugong Hen. Palparan laban sa mga magsasaka’t mamamayan ng 3,100 at buong Fort Magsaysay Military Reservation (FMMR) ay marami ng biktima ng pandarahas, pamamaril at pamamaslang kabilang na sa panahon ng ehersisyong militar (Balikatan) ng AFP at mga sundalong dayuhan. Patuloy na nag-ibayo ang papatinding karahasan mula ng gawin ang haywey sa Brgy Mapalad, Sta. Rosa na tumagos hanggang Brgy. Sagana, Laur. Sa araw ng pagdating ni Pope Francis sa bansa noong ika-15 ng Enero 2015 ay pinagbabaril ang mga magsasaka sa Lot 29 ng mga salarin na hanggang ngayon ay hindi naipatutupad ang arrest warrant. Matapos nito ay inatake ng sunod-sunod na panununog ng mga kubo at paninira ng mga pananim ng mga magsasaka sa Lot 28. Halos isang buwan lamang ang nakalilipas ng taon ding ito, ay pinagbabaril din at malubhang tinamaan ng bala ang dalawang magsasaka dito. Pinakahuli ay ang masaker nitong ika-3 ng Septyembre na ikinasawi ng apat na magsasaka at may mga nasugatan pang iba. Nararapat ng wakasan ang serye ng mga pamamaril at pamamaslang sa mga magsasaka sa buong sakop ng (FMMR), lalu na sa saklaw ng Lots 28, 29, 23 at 18 na bumubuo ng 3,100 ektarya. Matatandaan na ang apat na loteng ito ay inihiwalay sa saklaw ng FMMR sa bisa ng EO 448 para ipamigay sa mga biktima ng pagsabog ng Bulkang Pinatubo. Mahigit ng dalawang dekada ang lumilipas ay hindi pa ito naipapamahagi sa halip ay napupunta sa kontrol ng mga umaangking panginoong maylupa, burukrata at matataas na opisyal ng pulis at militar. Nakikisabay din dito ang mga ispekulador at raketer ng mga lupa na isinasangkalan ang magsasaka sa agaw-lupa at iba pang paraan ng pangangamkam ng lupa. Higit na tumitindi ang pangangamkam dito sa paglaganap ng mga ispekulador ng lupa, kasama na ang mga raketer, dulot ng mga neoliberal na proyekto tulad ng eko-turismo ng pamahalaang lokal ng Palayan kasama na ang Aulo Dam Water Sports Complex na nasa investment plan ng probinsya. Kasama na rito ang pagkakagawa ng haywey ng Mapalad Sta. Rosa-Sagana, Laur na bahagi ng Tarlac-Dingalan Port Road Project ng rehimeng GMA. Dumaragdag pa dito ang pribatisasyon ng mga mayor na bahagi ng mga operasyon ng National Bilibid Prison (NBP) na itatayo sana Brgy. Nazareth, Gen. Tinio na saklaw ng FMMR. Pinapaypayan pa ang ispekulasyon ng aprubado ng Korte Suprema na EDCA kung saan isa ang FMMR sa natukoy na tatayuan ng Kampo Militar para eksklusibong gamitin ng mga sundalong Amerikano. Ang mga tulo-laway na mga naglipanang ispekulador-raketer ay patuloy na bumabangis ang pag-aangkin ng mga lupain sa 3,100 at sa buong saklaw ng FMMR. Hindi kataka-taka na napakatagal ng inuupuan ng mga lumipas na mga rehimen ang pagsusulong ng pamamahagi ng lupa sa 3,100 at ang kawalan ng mapagpasyang resolusyon sa mga pagpapalayas, pangangamkam at pandarahas sa magsasaka sa kabuuang bilang ng 15 barangays sa mga bayan ng Sta Rosa, General Tinio, Palayan City, Laur at Dingalan (Aurora) na saklaw ng FMMR. Naniniwala tayo na mapagpasyang makakamit ang katarungan para sa magsasaka sa pamamagitan ng kagyat na libreng pamamahagi ng lupa sa 3,100 at sa lahat ng produktibong lupaing binubungkal sa FMMR. Sa ganito lamang mapagpasya din na malalantad, mapapanagot at mawawalis ang mga landgrabbers-ispekulador-raketers para bigyang puwang ang pamamahagi ng lupa sa magsasakang tuwirang magbubungkal. Kung gayon, nananawagan tayo sa DAR na kagyat na simulan ang pamamahagi ng 3,100. Nananawagan din tayo na kagyat na kumilos ang mga magsasaka’t DAR upang kagyat na kilalaninn ang mga karapatan sa kasalukuyang aktwal na binubungkal na lupa at paninirahan tungo sa pagkilala ng ganitong kasalukuyang paggamit. Mainam na hangarin na maisakatuparan ito habang may ibinubukas na puwang ng pagbabago at makatarungang kapayapaan ang rehimen ni Pangulong Duterte sa anyo ng Presidential Proclamation na ihihiwalay na sa FMMR ang mga lupang binubungkal ng magsasaka’t paninirahan ng mamamayan. Upang maisulong ang ating mga hangaring ito ay nararapat na tayong lahat na kapwa ka-uring magsasaka ay tibayan ang hanay at higit na palakasin ang matalas na anti-pyudal na pakikibaka’t mga pagkilos. Sa ganitong balangkas lamang natin maisasagawa ang mga mabisang taktika’t pagkilos kasama na ang epektibong samasama at organisadong pagbubungkal at depensa sa mga tiwangwang na lupain. Makatarungan ito lalo na ngayon na matindi ang pambubusabos, kagutuman at hikahos sa kabuhayan ang maraming maralitang magsasaka’t mamamayan. Sa pagtangan ng anti-pyudal na linya ay matitiyak natin ang solidong pagkilos na pinangungunahan ng batayang saray ng masa ng uring magsasaka upang sa gayon ay masusuri, mabantayan at maiwasan natin na naisusubo tayo ng mga ispekulador-raketers sa ekonomista o kaya’y tiwaling agaw-lupa at kapahamakan. Sa wastong pagtahak ng linyang anti-pyudal ang ating tagumpay! Nananawagan tayo na puspusan at komprehensibong imbestigahan ang lahat ng kaso ng pandarahas, pamamaril, panununog at paninira, pambubugbog at pamamaslang. Sa kagyat ay ipatupad ang arrest warrant at arestuhin ang mga salarin ng pamamaril noong Enero 15, 2014 kasabay ng kagyat na pagsisimula ng mabisa at puspusang imbestigasyon sa pinakahuling masaker. Nananawagan din tayo sa DAR, DSWD at iba pa, na mabigyan sana ng mga kinakailangang ayudang materyal, pinansyal at legal ang mga biktima’t pamilya nila. Nakahanda ang AMGL-NE na tumulong bilang daluyan o katuwang ng anumang ayuda ng inyong mamarapating sa mga biktima’y ilaan.#####
0 Comments
Leave a Reply. |
AuthorThe RMP is a national organization, inter-congregational and inter-diocesan in character, of women and men religious, priests and lay. We live and work with the peasants (farmers, fisherfolks, indigenous peoples and agricultural workers). Archives
October 2016
Categories |